Մերձավոր Արևելքում տիրող լարվածության պատճառով Արևմտյան Եվրոպայի խոշորագույն երկրների ֆոնդային ինդեքսների մեծ մասն ուրբաթ օրվա առևտրաշրջանն ավարտել է անկումով։

Բացառություն է կազմել բրիտանական FTSE 100 ինդեքսը, որն աճել է 0,27%-ով։ Դա կապված է եղել այն նորության հետ, որ Մանչեսթերի նախկին քաղաքապետ Էնդի Բըրնհեմը պաշտոնապես դարձել է բրիտանական Լեյբորիստական կուսակցության նոր առաջնորդը։ Երկուշաբթի՝ հուլիսի 20-ին, երկրի վարչապետ Քիր Սթարմերը պաշտոնապես հրաժարական է ներկայացրել և Չարլզ III թագավորը Բըրնհեմին կխնդրի ձևավորել նոր կառավարություն։

Եվրոպական խոշորագույն ընկերությունների Stoxx Europe 600 համահավաք ինդեքսը նվազել է 0,34%-ով՝ հասնելով 641,53 կետի։

Գերմանական DAX ինդեքսը կորցրել է 0,34%, ֆրանսիական CAC 40-ը՝ 0,47%, իտալական FTSE MIB-ը՝ 0,94%, իսկ իսպանական IBEX 35-ը՝ 0,45%։

Համաշխարհային շուկաների վրա լրացուցիչ ճնշում է գործադրել ներդրողների կողմից կիսահաղորդչային ընկերությունների ակտիվներից միջոցների դուրսբերումը՝ կապված տարեսկզբի թռիչքաձև աճից հետո դրանց չափազանց բարձր գնահատման մտահոգությունների հետ։ Իրավիճակը չեն կարողացել բարելավել նույնիսկ ոլորտի առաջատարների, այդ թվում՝ նիդեռլանդական ASML-ի և թայվանական TSMC-ի ուժեղ կանխատեսումները։

ASML-ի ակցիաների գինն ուրբաթ օրը նվազել է 3,8%-ով, Infineon Technologies-ինը՝ 1,6%-ով, իսկ ASM International-ինն ու STMicroelectronics-ինը՝ 4%-ով։

Burberry-ի թղթերի մեջբերումները նվազել են 6,4%-ով։ Շքեղության դասի ապրանքներ արտադրող բրիտանական ընկերությունն առաջին ֆինանսական քառորդում, որն ավարտվել է հունիսի 27-ին, հասույթն ավելացրել է 5%-ով։ Այնուամենայնիվ, ընկերությունը հայտարարել է, որ Մերձավոր Արևելքի հակամարտությունն բացասաբար է ազդել Եվրոպայում զբոսաշրջային ծախսերի վրա։

«Լյուքս» սեգմենտի այլ ներկայացուցիչների շուկայական արժեքը նույնպես նվազել է․ LVMH-ինն ու Christian Dior-ինը՝ 1,6%-ով, Kering-ինը՝ 1,2%-ով, Hermes-ինը՝ 1,5%-ով։

Dassault Systemes-ի ակցիաների արժեքն ընկել է 2,1%-ով։ Ծրագրային ապահովման ֆրանսիացի մշակողը բանակցություններ է վարում Nordic Capital-ից շուրջ 2 միլիարդ դոլարով ArisGlobal ընկերությունը գնելու շուրջ, որն արտադրում է ծրագրային ապահովում դեղերի կլինիկական փորձարկումների համար։

Էժանացել են նաև բանկերի ակցիաները․ Deutsche Bank-ինը՝ 2,7%-ով, Commerzbank-ինը՝ 3,1%-ով, Barclays-ինը՝ 1,5%-ով, Unicredit-ինը՝ 2,5%-ով։

Volvo Cars-ի կապիտալիզացիան գահավիժել է գրեթե 11%-ով։ Շվեդական ավտոարտադրողը 2026 թվականի երկրորդ քառորդում փոքր զուտ շահույթ է արձանագրել՝ միևնույն ժամանակ կրճատելով գործառնական շահույթն ու հասույթը՝ ավտոմեքենաների վաճառքի ծավալների նվազման պատճառով։

Միևնույն ժամանակ, Saab-ի ակցիաների գինն աճել է 9,7%-ով։ Շվեդական ռազմարդյունաբերական ընկերությունը երկրորդ քառորդում գործառնական շահույթն ավելացրել է սպասվածից ավելի արագ՝ առանցքային շուկաներում բարձր պահանջարկի շնորհիվ։

Նավթ արտադրողների թղթերի մեջբերումներն աճել են նավթի գների բարձրացումից հետո․ TotalEnergies-ինը՝ 1,3%-ով, BP Plc-ինը՝ 1,4%-ով, Shell-ինը՝ 2,4%-ով։

Բացի այդ, ուրբաթ օրը հայտնի է դարձել, որ եվրոյի գոտում սպառողական գները հունիսին տարեկան կտրվածքով ավելացել են 2,8%-ով։ Գնաճը դանդաղել է նախորդ ամսվա համեմատ (երբ կազմում էր 3,2%)։ Սրանք վերջնական տվյալներ են, որոնք համընկել են ինչպես նախնական գնահատականի, այնպես էլ Trading Economics-ի հարցված վերլուծաբանների կանխատեսումների հետ։

Իտալիայի բանկը բարելավել է ընթացիկ տարում երկրի տնտեսական աճի կանխատեսումը՝ հասցնելով այն 0,6%-ի (նախկինում ակնկալվող 0,5%-ի փոխարեն)՝ առաջին քառորդում արձանագրված ակտիվ աճից հետո։

Source: https://news.am/hy/news/1050696