«Վերջին տասը օրերի ընթացքում Ռուսաստանը բախվել է երեք երկրների կողմից ներկայացված դիվանագիտական բողոքներին։ Այդ երկրները գտնվում են աշխարհի տարբեր հատվածներում, որտեղ Ռուսաստանը փորձում է ընդլայնել, պահպանել կամ վերականգնել իր ազդեցությունն ու ներկայությունը»։ Այս մասին նշվում է Ուկրաինայի արտաքին հետախուզության ծառայության հրապարակման մեջ։
«Դրանք են Հնդկաստանը, Ադրբեջանը և Բոթսվանան։ Տարբեր պատճառներով այս երկրների կառավարությունները դժգոհություն են հայտնել Ռուսաստանի գործողություններից, ինչը վկայում է նրա համաշխարհային հեղինակության հետագա անկման մասին։
Հնդկաստանը մտահոգություն է հայտնել ռուսաստանյան թևավոր հրթիռների հարվածի կապակցությամբ MV Golden Leo բեռնանավին, երբ այն դուրս էր գալիս Օդեսայի նավահանգստից։ Հարձակման հետևանքով զոհվել է Հնդկաստանի չորս քաղաքացի։ Երկրի արտաքին գործերի նախարարությունը Ռուսաստանին վճռական բողոք է հայտնել և ընդգծել, որ առևտրային նավերի վրա հարվածներն ու խաղաղ բնակիչների զոհվելն անընդունելի են։ Նման հռետորաբանությունը ցույց է տալիս երկրների միջև հարաբերություններում յուրատեսակ տեկտոնական տեղաշարժ, որոնք մինչև վերջերս համարվում էին մերձավոր գործընկերներ։ Միաժամանակ այս իրադարձությունները զգալիորեն սահմանափակում են Ռուսաստանի դիվանագիտական հնարավորությունները նրա հռչակած «դեպի Արևելք շրջադարձի» շրջանակում՝ քանդելով վաղեմի կապերը և Մոսկվան վերածելով մեկուսացված պետության։
Ադրբեջանը փաստացի վերջ է դրել Ռուսաստանի տարածաշրջանային գերիշխանությանը Հարավային Կովկասում։ Բաքուն բողոքի նոտա է հղել Մոսկվա՝ կապված Նիկոլաևի մարզում ադրբեջանական SOCAR ընկերության բենզալցակայանի վրա ՌԴ հարձակման հետ։ Ադրբեջանը կտրականապես պահանջել է համակողմանի հետաքննություն և կոչ արել «պահպանել միջազգային պարտավորությունները՝ քաղաքացիական օբյեկտների պաշտպանության հարցում»։ Ավելի ուշ Ադրբեջանի նախագահը պաշտոնապես հայտարարել է, որ երկիրը պատրաստ է ամբողջությամբ փոխարինել Ռուսաստանին եվրոպական նավթագազային շուկայում։ Սա ևս մեկ անգամ ընդգծել է ՌԴ-ի կողմից հուսալի էներգետիկ գործընկերոջ և եվրոպական առաջատար ինստիտուտների լիիրավ անդամի կարգավիճակի կորուստը՝ այն դերի, որը երկիրը ժամանակին համարում էր իրենը։
Ռուսաստանը տուժել է նաև իր աֆրիկացի գործընկերների գործողություններից։ Բոթսվանան պաշտոնական հայտարարություն է տարածել «երկրի քաղաքացիներին խաբեությամբ հավաքագրելու դեպքերի մտահոգիչ աճի» վերաբերյալ՝ Ռուսաստանի կողմից Ուկրաինայի դեմ պատերազմում մարտական գործողություններին մասնակցելու համար։ Այս հայտարարությունը ոչ միայն դարձավ միջազգային հանրության կողմից Ռուսաստանի հասցեին համաշխարհային կարգն ու ՄԱԿ-ի կանոնադրությունը խախտելու հերթական մեղադրանքը, այլև ընդգծեց Ռուսաստանի պաշտպանության նախարարությունում կադրային ճգնաժամի լրջությունը։
Արդյունքում Ռուսաստանի ագրեսիվ վարքագիծը ավելի ու ավելի է վանում միջազգային գործընկերներին Մոսկվայի հետ համագործակցությունից։ Աշխարհը գիտակցում է Կրեմլի հետ ցանկացած հնարավոր ապագա հարաբերությունների «թունավորությունը» և աստիճանաբար փորձում է հեռու մնալ Ռուսաստանից», — նշել են Ուկրաինայի արտաքին հետախուզության ծառայությունում։
Source: https://news.am/hy/news/1051811