Այն բանից հետո, երբ Միացյալ Նահանգներն ու Իրանը ներկայացրին իրենց պատասխանները Պակիստանի և Կատարի՝ բանակցությունները վերսկսելու առաջարկին, աղբյուրը հայտնել է Al-Hadath հեռուստաալիքին, որ Իրանը պակիստանցի պաշտոնյաներին տեղեկացրել է, թե ինքը դուրս չի եկել բանակցություններից, այլ դրանք կասեցրել է։

Միաժամանակ Թեհրանը հաստատել է իր պատրաստակամությունը շարունակելու երկխոսությունը՝ Վաշինգտոնի և Թեհրանի միջև ստորագրված փոխըմբռնման հուշագրի համաձայն։

Իրանը պատրաստակամություն է հայտնել վերսկսել բանակցություններն այն կետից, որտեղ դրանք ընդհատվել էին՝ նշելով, որ հաստատել է իր պատրաստակամությունը շարունակելու բանակցությունները Ժնևում, Դոհայում կամ Իսլամաբադում։

Իրանը նաև տեղեկացրել է պակիստանյան կողմին Հորմուզի նեղուցում նոր միջանցք ստեղծելու անընդունելիության մասին՝ վերահաստատելով իր դիրքորոշումը այս կենսական կարևոր ջրային ուղում նավարկության վերաբերյալ։

Աղբյուրը պարզաբանել է, որ Իրանը պահանջում է վերսկսել բանակցությունները նախ՝ Հորմուզի նեղուցի հարցով, ապա՝ սառեցված միջոցների, իսկ դրանից հետո՝ միջուկային խնդրի շուրջ։

Միջնորդական ջանքերի ընթացքին ծանոթ երկու աղբյուր հայտնել են, որ Կատարը, Եգիպտոսը, Պակիստանը և այլ տարածաշրջանային միջնորդներ Միացյալ Նահանգներին և Իրանին ներկայացրել են տասնօրյա հրադադարի նոր առաջարկ։

Առաջարկը ներառում է երկու կարևոր պայման՝ ռազմական գործողությունների դադարեցում և համաշխարհային նավագնացության համար Հորմուզի նեղուց հասանելիության վերականգնում։

Առաջարկը նաև նախատեսում է Հորմուզի նեղուցի երկու նավագնացական երթուղիներով շարժի լիակատար վերականգնում, որպեսզի Օմանի ջրերով անցնող հարավային երթուղին ազատ լինի իրանական հարձակումներից, իսկ իրանական ջրերով անցնող հյուսիսային երթուղին՝ ամերիկյան ծովային շրջափակումից։

Տասնօրյա հրադադարի նպատակն է հնարավորություն տալ լուծում գտնել Հորմուզի նեղուցում նավագնացության հետ կապված ճգնաժամի համար, որը փոխըմբռնման հուշագրի ձախողման հանգեցրած հիմնական խնդիրն է։

Աղբյուրները հայտնել են, որ միջնորդները փորձում են զարգացնել այն առաջարկը, որը նախկինում քննարկվել էր Օմանի սուլթանության, Իրանի և Կատարի միջև Օմանի մայրաքաղաք Մասկատում հուլիսի 11-ին, երբ Միացյալ Նահանգները Իրանից պահանջել էին հրապարակայնորեն հաստատել Հորմուզի նեղուցը բաց պահելու պարտավորությունը։

Source: https://news.am/hy/news/1051818