Գերմանիայի կանցլեր Ֆրիդրիխ Մերցը նշել է, որ հուլիսի 25-ին Բեռլինի կենտրոնում գտնվող Թիրգարտեն զբոսայգու մոտ տեղի ունեցած ողբերգությունը «ազատական արժեքների դեմ հարձակում է»։ Խոսքն այն դեպքի մասին է, երբ ավտոմեքենան վրաերթի էր ենթարկել մարդկանց խմբին:
Նա նշել է, որ պատահարը քննարկվել է «Քրիստոնեա-դեմոկրատական միություն» (ՔԴՄ) կուսակցության նախագահության և դաշնային վարչության նիստերում: «Սա հարձակում էր մեր ազատության և ազատական արժեքների դեմ»,- լրագրողների հետ զրույցում հայտարարել է Մերցը՝ կատարվածը որակելով նաև որպես «հարված ազատությանն ու գերմանական ազատ հասարակությանը»:
Հուլիսի 25-ի երեկոյան լիբանանյան ծագումով 21-ամյա Գերմանիայի քաղաքացի Աբդուլ Բալլուտը մեքենայով մտել էր Բեռլինի Թիրգարտեն զբոսայգու մոտ հավաքված մարդկանց բազմության մեջ, որտեղ ընթանում էր ԼԳԲՏ համայնքի իրավունքների պաշտպանությանն ուղղված ակցիա: Գերմանիայի ուժային կառույցների փոխանցմամբ՝ կասկածյալը մաչետեով հարձակվել է մարդկանց վրա: Նրա գործողությունների հետևանքով զոհվել է մեկ կին, իսկ 29 մարդ ստացել է տարբեր աստիճանի վնասվածքներ: Հաջորդ օրը հարձակվողը չեզոքացվել է հատուկ գործողության ընթացքում:
Իրավապահ մարմինները հակված են այն վարկածին, որ Բալլուտը կարող էր «Իսլամական պետություն» ահաբեկչական խմբավորման համակիր լինել: Նա նախկինում արդեն դատապարտվել էր ահաբեկչություն նախապատրաստելու համար և ապառադիկալացման պարտադիր ծրագիր անցել:
Source: https://news.am/hy/news/1051929