Բժիշկները, իրավաբանները, ներդրումային բանկիրները և լրագրողները լրացուցիչ աշխատում են որպես արհեստական բանականության մարզիչներ։ Ապահովո՞ւմ են նրանք իրենց տեղը այն ապագայում, որտեղ գերիշխում է ԱԲ-ն, թե՞ իրենք են իրենց համար մահվան դատավճիռ ստորագրում։ Պատասխանը կախված է նրանից, թե ում կհարցնեք։

Ճկուն զբաղվածության Mercor հարթակը, որը բարձրակարգ սպիտակ օձիքավոր մասնագետներ է մատակարարում այնպիսի ԱԲ լաբորատորիաների, ինչպիսիք են OpenAI-ը, Anthropic-ը և Meta-ն, ներգրավում է տասնյակ հազարավոր նման փորձագետների։ Bloomberg-ի հաղորդմամբ՝ ընկերությունը կապալառուներին օրական վճարում է ավելի քան 2 միլիոն դոլար, սակայն նրանցից ոմանք արդեն հայտարարել են ներխուժող վերահսկողության մասին և այն մասին, որ իրենց «վերաբերվում են ինչպես մարդկային անասունի»։

Մինչ ոմանք ԱԲ-ի ուսուցումը անվանում են ֆրիլանսի նոր պահանջված ձևաչափ, մյուսները դա կոչում են «թաքնված վարձակալության և աշխատողների կարգավիճակի կեղծ փոխարինման սխեմա», գրում է Bloomberg-ը։ Կապալառու աշխատանքների բուն սահմանումը ենթադրում է անկախություն․ գործատուն իրավունք չունի թելադրելու, թե աշխատանքը կոնկրետ երբ և ինչպես պետք է կատարվի։ Այնուամենայնիվ, Mercor-ի նկատմամբ արդեն քննություններ են ընթանում կոշտ վերահսկողության պատճառով, որը ավելի բնորոշ է ավանդական գործատուներին։

Իրավիճակի պարադոքսը նաև այն է, որ ընկերության հիմնադիրները՝ 20-ն անց երիտասարդներ են, որոնք երբեք չեն աշխատել ավանդական կորպորատիվ հատվածում։

Սան Ֆրանցիսկոյի շրջանից ընկերության 23-ամյա հիմնադիրները Thiel Fellowship ծրագրի կրթաթոշակառուներ են։ Սա միլիարդատեր ներդրող Փիթեր Թիլի դրամաշնորհային ծրագիրն է, որը 250 000 դոլար է հատկացնում այն երիտասարդներին, ովքեր որոշել են թողնել քոլեջը կամ ընդհանրապես չընդունվել այնտեղ։ Այսօր նրանք դարձել են ամենաերիտասարդ և կայացած միլիարդատերերը։

Forbes-ի գնահատմամբ՝ գլխավոր տնօրեն Բրենդան Ֆուդին, տեխնիկական տնօրեն Ադարշ Հիրեմատը և տնօրենների խորհրդի նախագահ Սուրյա Միդհան տիրապետում են ընկերության բաժնետոմսերի մոտ 22%-ին։

«Սա խելահեղություն է», — խոստովանել է Ֆուդին Forbes-ին տված հարցազրույցում։ «Ամեն ինչ բացարձակ սյուրռեալիստական է թվում։ Ակնհայտ է, որ սա գերազանցում է մեր ամենահամարձակ երևակայությունները. նման բան դեռ երկու տարի առաջ մենք նույնիսկ պատկերացնել չէինք կարող»։

Այժմ ստարտափը բանակցություններ է վարում 500 մլն դոլարի ներգրավման շուրջ՝ այնպիսի գնահատմամբ, որը կարող է մեկ տարուց էլ քիչ ժամանակում կրկնապատկել նրա 10 մլրդ դոլար արժողությունը։

Ո՞վ է իրականում շահում ԱԲ-ի ուսուցումից

Felicis Ventures վենչուրային ընկերության կառավարող գործընկեր Սունդիպ Պիչուն, որը գլխավորել էր Mercor-ի նախորդ ֆինանսավորման փուլերը, իրավիճակը մեկնաբանել է Bloomberg-ի համար։ Նա նշել է, որ տվյալների առաջին դարաշրջանը ձևավորվել է ինտերնետի հաշվին, սակայն որպեսզի ԱԲ-ն տնտեսության համար իսկապես օգտակար դառնա, մարդիկ պետք է մոդելներին սովորեցնեն, թե ինչպես են իրենք գործնականում կատարում իրենց իրական աշխատանքը։

Սա շարքային մասնագետներին կանգնեցնում է ծանր երկընտրանքի առաջ․

Մի կողմից՝ փորձագետները կանխատեսում են մասնագիտական դասի փլուզումը։ Mercor-ի կայքին հպանցիկ հայացքը ցույց է տալիս, որ տեքստերի փորձագետի թափուր հաստիքը առաջարկում է ժամում 75-ից 150 դոլար, ինչը զգալիորեն ավելի շահավետ է, քան շատ ավանդական կորպորատիվ կամ խմբագրական նախագծեր։ Քչերը կարող են դիմակայել նման վաստակի հնարավորությանը։

Մյուս կողմից՝ աճում են ԱԲ-ի թեմայի շուրջ ապատիան և տագնապը, որոնք հատկապես տեսանելի են տնտեսական դուրսմղման ռիսկերի պատճառով։ ԱԲ մոդելներին կրթելը՝ նրանց փոխանցելով սեփական 10, 20 կամ 30 տարվա մասնագիտական փորձը, հոգեբանական ծանր փորձություն է․ չէ՞ որ հասկանում եք, որ սնուցում եք հենց այն էակին, որը վաղը ձեզ կզրկի աշխատանքից։

ԱԲ-ի պատճառով կրճատումները՝ 2026 թվականի իրականություն

Արհեստական բանականության ներդրման հետևանքով աշխատատեղերի կրճատման տեմպերը գնալով ավելի անհանգստացնող ծավալներ են ստանում։

Միայն 2026 թվականի առաջին կեսին ընկերությունները ԱԲ-ն նշել են որպես ավելի քան 101,000 աշխատակցի ազատման գլխավոր պատճառ․ սա արդեն իսկ զգալիորեն գերազանցում է ողջ 2025 թվականի ցուցանիշը, երբ գրանցվել էր շուրջ 55,000 կրճատում։

Թեև ոչ տեխնոլոգիական ոլորտներում ԱԲ-ի ինտեգրումը դեռևս զիջում է S&P 500 ինդեքսի հսկաների տեմպերին, աշխատաշուկայի վերափոխման ալիքն արդեն անխուսափելի է դարձել։ Ստեղծված իրավիճակում ֆինանսական անվտանգության բարձիկն ու եկամտի լրացուցիչ աղբյուրների որոնումը դառնում են գոյատևման առանցքային նախապայման ամենատարբեր մասնագետների համար։

Source: https://news.am/hy/news/1051872