Գազայի հատվածում տիրող իրավիճակի կարգավորման նպատակով ստեղծված Խաղաղության խորհուրդը հույս ունի, որ Պաղեստինի անկլավի կառավարման նոր համակարգի ներդրումը հնարավոր կլինի սկսել արդեն առաջիկա ամիսներին։ Այս մարմնի համապատասխան հայտարարությունը հրապարակվել է X-ի նրա էջում։
«Միջազգային կայունացման ուժերը վճռորոշ դեր կխաղան հումանիտար օգնության ծավալների ընդլայնման և Գազայի վերականգնմանն ուղղված ջանքերում։ Առաջիկա ամիսներին այս ջանքերը կվերածվեն կոնկրետ քայլերի՝ ուղղված կառավարման նոր մոդելի ներդրմանը, անվտանգության և տնտեսական հնարավորությունների ապահովմանը», — նշված է տեքստում։
Ավելի վաղ Իսրայելի անվտանգության կաբինետը որոշում է կայացրել, որը հնարավորություն է տալիս Գազայի հատվածում միջազգային ռազմական զորախումբ տեղակայել։ Գազայի հարցով Խաղաղության խորհրդի բարձր ներկայացուցիչ Նիկոլայ Մլադենովը հայտարարել է, որ ողջունում է այդ որոշումը և ակնկալում է միջազգային զորախմբի շուտափույթ տեղակայումն ու պաղեստինյան ծայրահեղական «Համաս» շարժման զինաթափումը։
Հունվարի 22-ին 19 երկրների ներկայացուցիչներ Դավոսում ընթացող Համաշխարհային տնտեսական ֆորումի շրջանակում ստորագրել են Գազայի հատվածում տիրող իրավիճակի կարգավորման նպատակով ստեղծված Խաղաղության խորհրդի կանոնադրությունը։ Վաշինգտոնում հայտարարել են, որ կազմակերպությանը միացել են նաև այլ պետություններ։ Խաղաղության խորհուրդը ձևավորվել է Իսրայելի և «Համաս»-ի միջև ձեռք բերված համաձայնության համապատասխան՝ Գազայի կառավարման համար, սակայն ենթադրվում է, որ այն կզբաղվի նաև այլ տարածաշրջաններում հակամարտությունների կանխարգելմամբ ու մարմամբ։ Գազայի կարգավորման առաջին փուլից երկրորդին անցնելը, ինչպես նաև անկլավի ղեկավարումը հատուկ ձևավորված տեխնոկրատական կոմիտեին հանձնելը, այս պահին խոչընդոտվում է «Համաս»-ի զինված խմբավորումների զինաթափման հարցով։
Source: https://news.am/hy/news/1051914