ՌԴ ԳԱ Օվկիանոսաբանության ինստիտուտի գիտնականները Կասպից ծովի ուսումնասիրության ընթացքում պարզել են, որ 1996 թվականից ի վեր դրա մակերեսը կրճատվել է 7,4%-ով, РИА Новости-ին են հայտնել ինստիտուտից։
«Հետազոտության արդյունքում հաստատվել է, որ 1996-ից մինչև 2025 թվականը Կասպից ծովի հայելու մակերեսը (ջրային մակերևույթի ընդհանուր տարածքը — խմբ.) կրճատվել է 28 644 քառակուսի կիլոմետրով՝ 1996 թվականի մակերեսի 7,4%-ով», — նշել են ինստիտուտում։
Գիտնականները նշել են, որ թեև ծանծաղացման այս ցուցանիշը չափերով համադրելի է Ալբանիայի Հանրապետության տարածքի հետ, այն բավական համեստ է եղել՝ համեմատած ծովի մակարդակի նվազման տեմպերի հետ։ Օվկիանոսաբանության ինստիտուտի տվյալներով, Կասպից ծովի մակարդակը 1995 թվականից ի վեր նվազում է տարեկան մոտ 10 սանտիմետր արագությամբ։
«Այս ընթացքում մակարդակն իջել է գրեթե երեք մետրով, ինչը հանգեցրել է բացասական հետևանքների. մասնավորապես՝ Վոլգա-Կասպյան ծովային նավարկային ջրանցքի և Կասպիցի բոլոր նավահանգիստների ծանծաղացումը դժվարացնում է նավարկությունը, ծովը հեռանում է բնակավայրերից», — ասել են գիտնականները։
Նրանք նշել են, որ, ըստ կանխատեսումների, XXI դարի վերջում Կասպից ծովի մակարդակը կարող է իջնել ևս 20–21 մետրով։
«Մենք առայժմ չենք տեսնում ծովի մակարդակի նվազման դանդաղում, քանի որ, հակառակը, եթե 2005–2019 թվականներին ծովի մակարդակը նվազում էր միջինում տարեկան 8,16 սանտիմետր արագությամբ, ապա 2020–2024 թվականներին այդ արագությունն աճել է մինչև տարեկան 22,7 սանտիմետր», — ասել է հետազոտության առաջատար հեղինակ, ինստիտուտի գլխավոր գիտաշխատող Անդրեյ Կոստյանոյը։
Source: https://news.am/hy/news/1050571