Բրիտանական ընդդիմադիր Reform UK կուսակցության առաջնորդ Նայջել Ֆարաժը հայտարարել է, որ վայր է դնում Քլեկտոնի ընտրատարածքից ընտրված պատգամավորի մանդատը, ինչը կհանգեցնի միջանկյալ ընտրությունների անցկացմանը, հաղորդում է BBC News-ը։
Միաժամանակ նա հայտնել է, որ մտադիր է այդ ընտրություններում կրկին առաջադրել իր թեկնածությունը։
«Սրանք լինելու են լրացուցիչ ընտրություններ ժողովրդի և իշխող վերնախավի միջև»,- տեսաուղերձում հայտարարել է Ֆարաժը՝ հավելելով, որ «Քլեկտոնի բնակիչներն իրենք պետք է դատեն իմ գործողությունների մասին»։
Նրա հայտարարությունը հնչել է իր ստացած ֆինանսական աջակցության մասին տեղեկության բացահայտման հարցերի շուրջ ծագած սկանդալի ֆոնին։ The Sunday Times պարբերականը գրել էր, որ Ֆարաժը չի նշել աջակցության որոշ տեսակներ, ներառյալ՝ իր վաղեմի դաշնակից Ջորջ Քոթրելից ստացած աշխատակիցների տրամադրումն ու անվտանգության ծառայությունները։
«Ես որևէ սխալ բան չեմ արել»,- հայտարարել է Ֆարաժը՝ հավելելով, որ «որևէ կերպ չի խախտել օրենքը»։ Նա միաժամանակ քննադատել է լրատվամիջոցներին այն բանի համար, որ նրանք, իր բնորոշմամբ, «հետապնդում են» իր ընտանիքին։
Բացի դրանից, Reform UK-ի առաջնորդը բախվել է կուսակցության հովանավոր Քրիստոֆեր Հարբորնի՝ 2024 թվականի սկզբին արած 5 միլիոն ֆունտ ստերլինգի չափով նվիրատվության վերաբերյալ հարցերին, որը նա պաշտոնապես չէր գրանցել։
Ֆարաժը պարզաբանել է, որ այդ միջոցները նախատեսված են եղել իր անձնական անվտանգության ապահովման համար։
Source: https://news.am/hy/news/1048431