Ֆրանսիական ռոբոտատեխնիկական UMA ընկերությունը Machina Summit գագաթնաժողովում ներկայացրել է արհեստական բանականությամբ իր առաջին հումանոիդ ռոբոտի դիզայնը, գրում է Interesting Engineering-ը։
Մշակողները հայտարարում են, որ ստեղծում են ոչ թե ցուցադրական նախատիպ, այլ գործնական հարթակ՝ գործարաններում, պահեստներում և լոգիստիկայում իրական կիրառման համար։
Ռոբոտն ունի մարդկային համամասնություններ, դեմքի փոխարեն՝ չեզոք վիզոր, և բաց մեխանիկական միացումներ։ Նման դիզայնը կոչված է ընդգծելու, որ մարդու առջև մեքենա է, այլ ոչ թե արհեստական կրկնօրինակ ստեղծելու փորձ։
Մշակման գլխավոր առանձնահատկությունը դարձել է Real-Time Learning արհեստական բանականության նոր համակարգը, որը ռոբոտին թույլ է տալիս նոր առաջադրանքներ յուրացնել՝ հետևելով մարդու գործողություններին, առանց յուրաքանչյուր շարժումը ձեռքով ծրագրավորելու անհրաժեշտության։
Փոխարենը, որ ինժեներները յուրաքանչյուր գործողության համար առանձին կոդ գրեն, ռոբոտը կարող է նայել, թե ինչպես է մարդը կատարում առաջադրանքը, կրկնել այն, հարմարվել փոփոխություններին և աստիճանաբար բարելավել իր հմտությունները։ UMA-ում կարծում են, որ նման մոտեցումը ռոբոտներին կմոտեցնի այն բանին, թե ինչպես են մարդիկ ձեռք բերում նոր կարողություններ։
Ընկերությունը նախատեսում է հումանոիդներին նախևառաջ օգտագործել արդյունաբերությունում՝ արտադրական գծերում, պահեստներում և լոգիստիկ օբյեկտներում։ Ռոբոտի մարդկային չափերը նրան թույլ կտան աշխատել արդեն գոյություն ունեցող ենթակառուցվածքում՝ օգտվել ստանդարտ գործիքներից, տեղաշարժվել սովորական տարածքներում և փոխգործակցել աշխատակիցների հետ՝ առանց ձեռնարկությունների մասշտաբային վերակառուցման։
Մշակողները սա անվանում են արդյունաբերական ռոբոտատեխնիկայի հաջորդ փուլ՝ անցում մեքենաներից, որոնք կատարում են խիստ սահմանված գործողություններ, դեպի համակարգեր, որոնք ունակ են մշտապես սովորել և ընդլայնել իրենց հնարավորությունները։
Ռոբոտի ֆիզիկական դիզայնը նույնպես արտացոլում է նախագծի արդյունաբերական ուղղվածությունը։ Իրատեսական դեմքի փոխարեն ինժեներներն ընտրել են պարզ տեխնիկական վիզոր, իսկ մեխանիկական տարրերը թողել տեսանելի։ Ընկերության խոսքով՝ դա սարքն ավելի հասկանալի է դարձնում և միաժամանակ ընդգծում է դրա ֆունկցիոնալությունը։
UMA-ն առայժմ չի բացահայտում ռոբոտի մանրամասն տեխնիկական բնութագրերը, սակայն հայտարարում է, որ գլխավոր նպատակը հուսալի մեքենա ստեղծելն է, որը կկարողանա երկար աշխատել բարդ պայմաններում և կուտակված փորձի շնորհիվ աստիճանաբար բարձրացնել արդյունավետությունը։
ԱՄՆ-ում և Չինաստանում հումանոիդ ռոբոտատեխնիկայի ակտիվ զարգացման ֆոնին ֆրանսիական ընկերությունը խաղադրույք է կատարում եվրոպական շուկայի վրա։ Մշակողները կարծում են, որ Եվրոպայի ուժեղ արդյունաբերական բազան, զարգացած գիտական միջավայրը և աշխատուժի պակասը ստեղծում են հարմար պայմաններ ֆիզիկական ԱԲ համակարգերի ներդրման համար։
UMA-ի գլխավոր տնօրեն և համահիմնադիր Ռեմի Կադեն հայտարարել է, որ հումանոիդ ռոբոտների զանգվածային տարածումը ժամանակ կպահանջի, ինչպես դա եղավ ինտերնետի և սմարթֆոնների դեպքում, սակայն ապագայում նման մեքենաները կարող են փոխել ֆիզիկական տնտեսությունը նույնքան ուժեղ, որքան թվային տեխնոլոգիաները փոխեցին տեղեկատվական աշխարհը։
Source: https://news.am/hy/news/1048811