Սահարայի փոշին տասը տարվա ընթացքում Մեծ Բրիտանիայում օդի աղտոտվածությունը 50%-ով մեծացրել է և այսպես կոչված «արյունոտ անձրևի» հավանականությունը։ Այս եզրակացությանն են հանգել Փոլ Շերերի ինստիտուտի գիտնականները, որոնց ուսումնասիրության արդյունքները հրապարակվել են Nature ամսագրում։
Հետազոտողները արհեստական բանականություն են օգտագործել՝ վերլուծելու համար օդում հանքային փոշու օրական ավելի քան 18,500 չափումներ, որոնք հավաքվել են Եվրոպայի 103 քաղաքային և գյուղական վայրերում 2012-ից 2021 թվականներին։ Նրանք պարզել են, որ անապատային փոշու կոնցենտրացիաները կայուն աճել են մայրցամաքի մեծ մասում։ Մեծ Բրիտանիայում այս ցուցանիշը աճել է առնվազն 50%-ով։
Հետազոտության հեղինակների խոսքով՝ Սահարայում փոշու փոթորիկների աճը պայմանավորված չէ փոշու փոթորիկների թվի աճով, այլ դրանց ինտենսիվության աճով։ Հյուսիսային Աֆրիկայում չորության աճի պատճառով քամիները զգալիորեն ավելի շատ ավազ և հանքային մասնիկներ են տեղափոխում Եվրոպա, քան նախկինում։
Սահարայի փոշին կարող է հազարավոր կիլոմետրեր անցնել՝ հասնելով Բրիտանական կղզիներ։ Այն բնորոշ նարնջագույն մայրամուտների, ամպամած երկնքի և «արյունոտ անձրևի» պատճառն է՝ անապատային փոշու առկայությունից ժանգոտ կարմիր երանգ ստացած անձրևներ։ Այս անձրևները նարնջագույն բծեր են թողնում մեքենաների, պատուհանների և այլ մակերեսների վրա։
Այնուամենայնիվ, հետևանքները տարածվում են անսովոր եղանակային երևույթներից շատ ավելի հեռու։ Մանր մասնիկները կարող են խորը ներթափանցել շնչառական ուղիներ՝ առաջացնելով հազ, աչքերի, քթի և կոկորդի գրգռում, շնչառության դժվարություն և ասթմայի սրացում։
Ուսումնասիրության հեղինակները զգուշացնում են, որ կլիմայի փոփոխության ուժեղացման և Հյուսիսային Աֆրիկայի հետագա անապատացման հետ մեկտեղ, անապատային փոշուց առաջացող օդի աղտոտումը կդառնա ավելի ու ավելի լուրջ խնդիր Եվրոպայի համար՝ առաջացնելով լրացուցիչ առողջական ռիսկեր։
Source: https://news.am/hy/news/1050199